Najib madah agih RM35j mantu rayat kandang RASCOM
February 24, 2010, Wednesday
SIBU: Datuk Seri Najib Tun Razak, kemari madahka agih semetak RM35 juta ungkup tiga bengkah projek kena nyungkak pengidup orang mayuh ba empat bengkah skim gempuru kandang RASCOM ke suba kala sigau kasak bala keminis.Menteri Besai Menua Malaysia nya madahka agih nya nyengkaum bantu ke bulih RM18 juta kena ngadu gaya pendiau 1,420 buah rumah panjai sebelah skim gempuru Nanga Janggau, Nanga Ngungun, Nanga Skuau enggau Nanga Tada.
“Bisi RM8 juta deka diagih kena ngaga jalai entara Nanga Janggau enggau Nanga Ngungun lalu RM9 juta kena ngaga siti klinik ba Nanga Tada,” ku iya bejaku maya program Ketuai Begulai enggau Rayat ba Rumah Ugap Seribu di Nanga Tada, Kanowit, kira 80 km ari tu, kemari.
Kelimpah ari bantu nya, Najib mega madahka bantu wang ngagai 377 nembiak sekula ba skim gempuru nya ke dijali nengah duit simpan ba Bank Simpanan Nasional.
Nengah program nya, nembiak sekula deka nerima RM450 setaun ngagai tiap siku lalu nembiak sekula sekonderi bulih bantu RM600 setaun tiap siku sida mega.
Iya mega minta Opis Pemansang Orang Bekebun Getah Mit (RISDA) ngelala palan sebelah skim gempuru ke tau dikemansang nyadi palan endur nanam getah ke mendam.
Nya ku iya kena mantu rayat merinsa ba skim nya ngambika sida bisi penatai belanja ke tetap ngena jalai sama bambi ulih ba projek bekebun nya.
Skim gempuru RASCOM ditumbuhka Menteri Besai Menua Malaysia kedua, iya nya Allahyarham Tun Abdul Razak ke mega apai Najib kenyau ari 1972 kena ngelindung rayat ari kachau bala keminis maya nya.
Ku Najib, pengawa baru iya mantu rayat ba skim nya dikarap ulih muka pengidup baru orang dia ngambika ngasaika pengidup ke lantang sereta senang agi udah apai iya kelia ngepunka runding skim gempuru ngelindung sida iya ari tachah bala keminis.
Pia mega, Najib madah perintah besai sedia deka mantu mai pulai semua rangkah 22 iku sedadu Sarawak ke parai di Semenanjung Malaysia ngambika ditumbak ba menua sida iya empu di Sarawak ditu.
Ku iya, bala sedadu nya ke nyadi renjer sereta penyidi (tracker) parai berambunka nyawa ngetanka menua ari tachah bala keminis lebuh maya menua bedau siga suba. — Bernama
Thu Feb 25, 2010 12:58 am
